مراد ونور الحلقه السادسه كامله بقلم الكاتبه ميمو صلاح
صوت الرعد كان بيرج العمارة والقصر كله بره، والمطر نازل يضرب في الشبابيك الإزاز زي طلقات الرصاص.
جوه البهو الكبير، الجو كان متكهرب كأن فيه قنبلة موقوتة هتفرقع في أي لحظة.
نور كانت واقفة، دمها بيغلي وعينيها بتطلع شرار وهي شايفين ميرا رمية نفسها في حضن مراد وشابكة في قميصه، بتمثل دور البطة المذبوحة الخايفة من الدنيا.
مراد مسك ميرا من دراعاتها وبعدها عنه بالراحة بس بحزم، وبص لسليم الحارس وقال بصرامة:
“سليم! اطلب الدكتورة تيجي حالاً، وتطلع فوق تجهز الجناح الشرقي للبنت دي.”
ميرا مسكت في إيد مراد تاني بسرعة، ودموعها نزلت كأنها شلال:
“مراد أرجوك! متسيبنيش لوحدي.. عاصم لو عرف إني هربت منه هيجيب رجالته ويدبحوني! أنا خايفة.. خليني قريبة منك هنا، حتى لو هقعد على الأرض مش هتكلم والله!”
نور مقدرتش تمسك نفسها أكتر من كده.. خطت خطوات سريعة ونزلت فيها بكل غضب الدنيا:
“جرى إيه يا حيلة أمك؟! ما تفوقي لنفسك وكفاية نحنحة ودموع مسرحيات! فاكرة نفسك داخلة لوكاندة وبتمثلي دور الضحية؟ قومي امسحي الخرا اللي في عينيكي ده ومتمثليش علينا!”
ميرا بصت لنور بربشة عين وتفاجؤ مصطنع، وقالت بصوت مكسور بتمثيل متقن:
“بتهاجميني ليه كده يا نور؟ هو عشان عاصم يبقى جوز أمي ورباني في قسوته وظلمه، أكون أنا زيه؟ إنتي أكتر واحدة عارفة الراجل ده يعمل إيه! أمك الله يرحمها ماتت بحسرتها من أفعاله.. وأنا كان هيبيعني لراجل كد أبوي عشان صفقاته، ولم اعترض ضربني وهربت بشرفي! جاية تظلميني إنتي كمان؟”
الكلمة نزلت على قلب نور زي طعنة س\كينة.. جابت سيرة أمها المقهورة وموتها، وده ولاّع نار جوه نور وخلاها تحس إن ميرا بتلعب على الحتة اللي توجعها بقلة أدب.
نور صرخت فيها:
“ماتجبيش سيرة أمي على لسانك الزفر ده! إنتي وهو زبالة واحدة، واللعبة الرخيصة دي مش هتدخل عليا!”
مراد حط إيده على كتف نور يحاول يلم الدور ويهديها:
“نور.. اهدي، مش وقت الحساب ده خالص. البنت حالتها بالبلا وشكلها متقطعة من الضرب، لما نطمن إن مفيش خطر حقيقي هنشوف القصة إيه.”
نور سحبت دراعها من إيده بعنف، وبصت له بوجع وذهول:
“نطمن عليها؟! برافو يا مراد.. بجد برافو عليك! حنت عليك بسرعة وصدقتها من كلمتين؟ تمام أوي.. اتطمن يا حنين، اتطمن!”