لو قالولي اني هجوز

ملك روحت بتعيط لريناد، قالت لها انا مش عارفة ماله، كان كويس وفجأة اتغير، ريناد قالت لها يمكن عرف انك بتحبيه فبيبعد، قالت لها انا محبتهوش، ريناد قالت لها بطلي كدب بقى.

عدي استغل الفرصة وراح لملك قال لها شايفة الدكتور بتاعك سابك ازاي، انا موجود وهفضل جنبك، ملك قالت له انت بني ادم انتهازي وامشي من وشي.

فارس كان بيتعذب اكتر منها، كان بيبعد وهو بيموت، بقى يسهر طول الليل يفكر فيها، لحد ما كنان صاحبه راح له البيت، قال له يا فارس مالك، انت بتحب البنت دي، فارس قال له لا، كنان قال له بتحبها وباين عليك، ولو بتحبها روح قول لها، الدنيا مش مستاهلة، فارس قال له مينفعش انا دكتورها ولو اتكلمت هأذيها وهأذي نفسي، كنان قال له الحب مش عيب، العيب انك تسيبها وتظلمها.

تاني يوم كان في محاضرة اخر محاضرة قبل الفاينال، ملك مدخلتش، فارس دخل المدرج وفضل يدور عليها بعينه ملقهاش، الشرح مكنش مركز، خلص المحاضرة بدري وخرج، لقى ريناد مستنياه برا، قالت له يا دكتور ملك تعبانة بقالها يومين ومش بتيجي عشان انت زعلتها، انت ليه بتعمل فيها كده، دي بتحبك، فارس اتصدم، قال لها بتحبني، قالت له اه بتحبك وبتعيط طول الليل، وانت لو بتحبها بجد متسبهاش.

فارس ساب كل حاجة وراح على بيت ملك اللي عنوانه كان عنده في شئون الطلبة، خبط على الباب، امها فتحت، قال لها انا دكتور فارس، ملك موجودة، ملك سمعت صوته وطلعت وهي لابسة ترنج ومربوطة شعرها وعنيها وارمة من العياط، قالت له انت ايه اللي جابك هنا، قال لها جاي اشوفك، قالت له بعد ما قفلت الباب في وشي وجرحتني، قال لها كنت خايف عليكي من كلام الناس، قالت له وانت فاكر لما تبعد كده بتحميني، انت وجعتني اكتر.

فارس قرب منها وقال لها انا اسف، انا حاولت امنع نفسي احبك بس مقدرتش، من اول يوم دخلتي فيه المدرج واتخانقتي معايا وانتي دخلتي قلبي، انا اللي كنت بقول ممنوع الوقوع في الحب وقعت في حبك، ملك عيطت وقالت له وانا كمان وقعت، كنت بقول بكرهك وكنت بموت فيك.

فارس مسك ايدها وقال لها تتجوزيني، ملك ضحكت وسط دموعها وقالت له انت مجنون، احنا لسه، قال لها هتخلصي امتحاناتك وهاجي اخطبك رسمي، انا عندي اتنين وتلاتين سنة ومش هستنى تاني، ملك قالت له موافقة بس بشرط، قال لها ايه، قالت له متسقطنيش في الفاينال، ضحك وقال لها ده انتي هتجيبي امتياز غصب عني.