لو قالولي اني هجوز

وفعلا ملك دخلت الفاينال وجابت امتياز، وفارس راح خطبها، واتعملت خطوبة كبيرة حضرها كل الدفعة، حتى لارا جت وباركت لهم بعد ما عرفت ان الحب الحقيقي مبيستخباش، وعدي عرف انه ملهوش نصيب، وريناد كانت اشبينتها وكنان كان شاهد على العقد، وفارس اللي كان بيقول ممنوع الوقوع في الحب بقى يقول لطلبته اهم مادة في الكلية هي الحب.

وبعد الخطوبة الدنيا اتغيرت خالص، فارس بقى بني ادم تاني، الضحكة بقت على وشه طول الوقت، والطلبة بقوا مستغربين ان الدكتور الحديد بقى يهزر ويضحك، ملك كانت كل يوم تروح الجامعة وهي طايرة من الفرحة، لابسة الدبلة اللي فارس جابها لها، دبلة بسيطة بس غالية عندها من الدنيا كلها، ريناد كل شوية تقول لها يا بختك يا عم وقعتي اكبر دكتور في الجامعة، ملك تقول لها وقع لوحده انا معملتش حاجة.

فارس بقى يديها محاضرات خصوصية في المكتبة، بس بدل ما يشرح استراكشر كان يشرح لها ازاي الحياة معاه هتبقى حلوة، يقول لها انا هبني لك بيت حلو زيك، وهعمل لك مكتبة كبيرة عشان انتي بتحبي القراءة، ملك تقول له وانا هعمل لك قهوة كل يوم الصبح قبل ما تروح الجامعة، بس اوعى تزعق للطلبة زي ما كنت بتزعق لي، يقول لها لا خلاص بطلت ازعق، انتي علمتيني ان الكبرياء مش بيعمل غير الوحدة.

وفي يوم لارا راحت لملك واعتذرت لها، قالت لها انا اسفة اني وقعت بينكم واني غيرت منك، ملك حضنتها وقالت لها محصلش حاجة، انتي اختي، ولارا بقت صاحبتهم التالتة هي وريناد، بقوا التلاتة يخرجوا مع بعض، وفارس وكنان وعدي بقوا شلة واحدة بعد ما عدي نسي حب ملك وبقى يشوفها زي اخته.

يوم الفرح فارس كان لابس بدلة بيضا وملك لابسة فستان ابيض زي الملاك، كل الجامعة حضرت، العميد نفسه حضر وبارك لهم، وقال لفارس شوفت بقى الحب مش عيب، العيب اننا نخبيه، فارس بص لملك وقال لها فاكرة اول يوم لما قولتيلي مش هطلع من المحاضرة، ملك قالت له فاكرة، ولو رجع بيا الزمن هتخانق معاك تاني، عشان الخناقة دي هي اللي جابتنا لبعض.

وعاشوا بعد كده حياة حلوة، ملك اتخرجت وبتقدير امتياز مع مرتبة الشرف، واشتغلت معيدة مع فارس في نفس القسم، وبقوا يدرسوا مع بعض، الطلبة بقوا يحبوهم هما الاتنين، ويقولوا عليهم ثنائي الحب والهندسة، وكل بنت تدخل الكلية جديدة تسمع قصة الدكتور المغرور والطالبة العنيدة اللي كسرت كبرياءه وهو كسر غرورها، ويعرفوا ان الحب ممكن ييجي من اكتر مكان مش متوقع، وممكن ييجي من خناقة في مدرج مليان طلبة، ويفضل مكمل للاخر.