ممكن تعملي نفسك حفيدتي
العربية الجيب وقفت، ونزل منها الحاج محمود. كان لابس نفس القميص المكوي، وبدلة قديمة بس نظيفة جداً. ونزلت جنبه نور، ماسكة إيده بثبات.
إلهام ابتسمت بسخرية وقربت منهم:
”أهلاً يا حكيمة هانم.. جيباه ورجليكم على رقبتكم أهو؟ كويس إنك عقلت يا عمي ومسمعتش كلام الشوارعية دي. يلا ادخل امضي التوكيل بالهدوء بدل ما ندخل في محاكم وحجر ونفضح اسم العيلة.”
رامي ابنها قرب وهو بيبتسم ببرود:
”يلا يا حاج.. عشان نلحق نحجز لك الأوضة المكيفة في الدار.. هناك هتلاقي عواجيز زيك يلعبوا معاك دومينو!”
في اللحظة دي.. الحاج محمود ما اهتزش. بص لإلهام ورامي وقال بنبرة هادية وقوية جداً:
”أنا مش لوحدي يا إلهام.. أنا معايا حفيدتي.. ومعايا حفيدي الحقيقي اللي إنتي سرقتيه مني!”
قبل ما إلهام تستوعب الكلمة، عربية براند جديد وقفت بصوت قوي قدام المبنى. نزل منها المهندس عمر، ومعاه اثنين محامين بكارنيهات محاماة النقابة العليا، ووراهم عربية شرطة نزل منها ضابط برتبة نقيب!
إلهام وشه أصفر، والورق اللي في إيدها وقع على الأرض:
”عمر؟! إنت.. إنت إيه اللي جابك من السفر؟!”
عمر قرب منها، خطواته كانت زي الجبال. وقف قدامها وبص لها بنظرة كفيلة تحرقها:
”جيت عشان أشوف الرعاية الصحية اللي بتوفريهالي لجدي يا عمتي! جيت عشان أشوف الفلوس اللي كنت ببعتها لك شهرياً كانت بتروح فين.. وأكتشف إنك بتخططي للحجر عليه وتسرقي بيته!”
رامي حاول يتدخل ويتقمص دور الشجاع:
”جرى إيه يا عمر! إحنا بنعمل كده لمصلحته.. الراجل خرف وبيطلع الشارع يتكلم مع الغرباء ويقول على واحدة ما نعرفهاش إنها حفيـ…”
قبل ما يكمل كلمته، عمر مسكه من ياقة قميصه وضربه بالقلم على وشه حركة هزت الشارع كله:
”اسمه الحاج محمود يا حشرات! الجزمة بتاعته برقبتك أنت وأمك!”
المحامي اللي كان مع عمر قدم للضابط وللموظف المسئول ملف كامل:
”يا فندم.. ده تقرير طبي معتمد صدر الساعة 7 الصبح النهاردة من مستشفى القصر العيني تحت إشراف لجنة طبية، يثبت إن الحاج محمود بكامل قواه العقلية والذهنية، ولا يعاني من أي خرف. ودول صور من التحويلات البنكية اللي كان المهندس عمر بيبعتها للمدعوة إلهام، وده بلاغ رسمي بتهمة النصب، والتزوير، والاستيلاء على أموال القاصر ورعاية كبار السن بطرق غير مشروعة!”