مرات اخويا… روماني مكرم
محمود أصر إنه يقعد معايا في الشقة وميفارقناش لحظة، وكلم الحاج عبد الستار كبير الحتة وحكى له على اللي حصل. الحاج عبد الستار غضب وجمع شباب المنطقة وقال: “بيوتنا وشرفنا مش لعبة، والست سماح دي أختنا كلنا وعيالها عيالنا، ومن النهاردة الشارع كله حراسة، وأي غريب هيدخل الحتة شكلة مش مريح هينضرب قبل ما يتسأل هو مين!”.
كلام الجيران وأخويا حط في قلبي جمرة نار وقوة، وقولت لنفسي: “أنا سماح اللي وقفت قدام خيانتهم وفضحتهم، مش هخاف من شوية صبيان تبع حماتي!”. كلمت الأستاذ فريد المحامي وحكيت له، فقال لي بفطنة: “ده أحسن دليل نثبته ضدهم يا مدام سماح.. إحنا هنرفع قض..ية تهديد وترويع، والمكالمة اللي جاتلك من أم طارق هنعمل بيها بلاغ في مباحث الإنترنت، والشارع عندك أكيد فيه محلات فيها كاميرات صورت العربية السودا والشابين”.
وفعلاً، محمود نزل مع شباب الحتة وفرغوا كاميرات السوبر ماركت اللي على أول الشارع، وجبنا رقم العربية ووشوش الشابين بكل وضوح، وطلعنا على القسم وعملنا محضر رسمي بالتهديد وخطف الأطفال، وأرفقنا فيه تسجيل المكالمة وصور الكاميرات.
النيابة تحركت بسرعة الصاروخ، لأن الق.ضية أصلاً كانت سخنة، والبوليس نزل جاب الشابين من بيوتهم في أقل من ٢٤ ساعة، وأول ما دخلوا الحجز واعترفوا إن اللي محركاهم ومأجراهم هي “أم طارق” عشان تضغط عليا أتنازل عن قض..ية ابنها. البوليس طلع أمر ضبط وإحضار لحماتي، والمنطقة كلها شافت الست اللي كانت جاية تتبلطج وهي مقبوض عليها ومكلبشة ورايحة تلحق بابنها في الحجز!
قبل ما تمشي، بصت لي من ورا الإزاز وعينها مليانة كسرة وغل، وصرخت: “ارحميني يا سماح.. ارحميني وبلاش تخربي بيتنا كله!”. بصيت لها بكل برود وقولت: “بيتك اتخرب يوم ما ربطتي ابنك على عينه الزايغة ودافعتي عن خيانته.. القانون بيننا يا حماتي”.
في السجن، طارق عرف إن أمه كمان اتقبض عليها، واللعبة اللي كان راسمها اتهدت فوق دماغه ودماغ أهله، وبقى قاعد في زنزانته منهار تماماً وعارف إن مستقبله وشرفه وكل قرش حيلته ضاع وللأبد، وهدير جنبه في العنابر التانية بتندب حظها بعد ما الكل اتبرأ منها.
قعدت في شقتي، وبصيت لعيالي وهم نايمين في أمان، وبصيت لعقود الملكية اللي اتسجلت وبقت في حفظ وصون، وحسيت إن حقي وحق أخويا محمود رجع تالت ومتلت.. بس الحكاية لسة ليها فصل أخير، محاكمة القرن في منطقتنا كانت على وصول، والكل مستني القاضي ينطق بالحكم اللي هيبرد نار قلوبنا للآخر..