روايه عنيده في حرملك السلطان الحلقه الاولى والثانيه بقلم الكاتبه نور محمد

"يا بنت المجنونة يا نور! بقى تسيبي التكييف، والواي فاي، وسريرك اللي بياخدك في حضنه، وتجري في الشارع الساعة اتنين بالليل بشنطة عجلها مكسور؟" الشارع كان ضلمة كحل، وصوت عجل الشنطة المكسور بيفضحها في عز السكون. نور بتنهج، حاطة إيدها على وسطها وبتبص وراها بخوف. لابسة بنطلون جينز مقطع على الركب، وتيشيرت واسع مكتوب عليه بالبنط العريض "مستقلة وأفتخر"، وشعرها الكستنائي طاير في كل حتة. البنت اللي لسه مخلصة هندسة وبتحلم تستقل بحياتها، لقت نفسها فجأة قدام كابوس اسمه "ابن خالتك نازل من الخليج والفرح كمان شهر". مفيش حل كان قدامها غير إنها تخلع! قعدت على رصيف قديم تاخد نفسها، وهي بتمسح عرقها وتكلم نفسها: "قال أتجوز قال! ده أنا أتجوز شغلي ومستقبلي ولا إني أصحى الصبح أعمل كوباية شاي لواحد بكرش بيسألني فين شراباتي يا هانم! أنا امرأة حرة، كيان مستقل، لا أُباع ولا أُشترى!" "وما الذي يدفع امرأة حرة مثلكِ لافتراش الأرصفة في هكذا وقت من الليل؟" نور اتنفضت من مكانها كأن سلك كهربا لمسها. لفت بسرعة لقت راجل عجوز قاعد جنبها على الرصيف. لابس عباية غامقة، ودقنه بيضا واصلة لصدره، وعينيه بتلمع تحت نور عمود النور الخافت. بلعت ريقها، ورغم إنها بتمثل القوة، بس "جينات الجبن" اشتغلت فوراً. رجعت خطوة لورا ومسكت شنطتها كأنها درع: "أنت مين يا حج؟ وطلعتلي منين؟ وبعدين إيه طريقة الكلام دي؟ أنت شغال مدرس لغة عربية؟" العجوز ابتسم بهدوء وماتأثرش بهجومها، ورد بصوت رزين: "أنا مجرد عابر سبيل يا ابنتي، سمعت شكواكِ للنجوم، ورأيت روحكِ التواقة للتحرر. أخبريني، مِمَّ تهربين؟" نبرة صوته الهادية ريحتها شوية، وبطبيعتها اللي مابتعرفش تسكت، قعدت على الشنطة وبدأت تفضفض: "بهرب من سجن يا حج.. سجن التقاليد. أهلي عاوزين يجوزوني غصب عني لواحد مشوفتهوش. أنا نور! البنت اللي طلعت الأولى على دفعتها، اللي بتحلم تبني ناطحات سحاب. أنا عاوزه أعيش حرة، مستقلة، محدش يؤمرني ولا يتحكم فيا!" العجوز فضل يسمعها وابتسامته بتوسع، وبعدين مد إيده في جيب عبايته وطلع قزازة صغيرة جداً، محفورة بنقوش غريبة، وجواها سائل أحمر بيلمع. مد إيده بيها وقال بوقار: "إن كانت رغبتكِ في الحرية والاستقلال صادقة إلى هذا الحد، فتناولي هذا الترياق. قطرة واحدة منه تكفي لكي تنتقلي إلى المكان والزمان اللذين ستتحقق فيهما أمنيتكِ فوراً." نور بصت للقزازة، وبعدين بصتله وطقت من الضحك: "لا إله إلا الله! هو أنا هربت من أهلي عشان أقع في ساحر ومشعوذ؟ ترياق إيه يا حج؟ أنت حاططلي في البتاع ده إيه؟ عصير فراولة؟" العجوز حط القزازة جنبها على الرصيف وهو لسه مبتسم: "الخيار لكِ يا نور. إما العودة إلى سجنكِ، وإما شرب هذا السائل وبدء حياة جديدة. وداعاً." وفي ثانية، عربية عدت بسرعة، ولما نور لفت وشها تاني.. الراجل كان اتبخر! فركت عينيها بذهول: "إيه ده؟ اختفى إزاي؟ عفريت ده ولا إيه؟ يا مامي!" بصت للقزازة اللي على الأرض. السائل الأحمر بيتحرك جواها كأنه بيناديها. موبايلها رن في الشنطة، الشاشة منورة باسم أبوها وعشرات المكالمات الفايتة، ورسالة من أمها: "ارجعي يا نور، ابن خالتك جاي بكرا ومفيش مفر". حست بخنقة فظيعة. الخوف من الجوازة دي عماها. مدت إيدها بتترعش ومسكت القزازة. الفضول واليأس خلوها تفتح السدادة. ريحة غريبة طلعت منها ريحة حاجة قديمة أوي. همست لنفسها بخوف: "يا رب ميكونش فيها سم فيران بس!" غمضت عينيها، رفعت القزازة، وشربت السائل كله مرة واحدة. طعمه كان لاذع وسخن نار! فجأة، حست إن الأرض بتلف بيها بسرعة جنونية. الشوارع والعربيات بقوا دوامات ألوان. حاولت تصرخ، صوتها مطلعش. حست إنها بتقع في بير ملوش قرار، لحد ما الدنيا ضلمت تماماً. "يا لها من قبيحة! من أين جاؤوا بها؟" "انظري إلى ثيابها! كأنها من رعاع الأسواق!" أصوات همس وضحك بنات ناعم ، بدأ يوصل لودن نور. راسها كانت هتنفجر. ريحة المكان تقيلة، كلها بخور ومسك. فتحت عينيها ببطء، لقت نفسها نايمة على سجاد إيراني فخم جداً. السقف عالي مليان نقوش إسلامية، ونجف نحاس ضخم مليان شمع منور. قامت تسند على إيدها بذهول. قاعة ضخمة كأنها قصر من حواديت ألف ليلة وليلة. والأغرب.. المكان مليان بنات! حوالي عشرين بنت قاعدين متفرقين، اللي بتاكل فاكهة واللي بتسرح شعرها واللي بتعزف عود. وكلهم آية في الجمال! لابسين فساتين حرير واسعة متطرزة دهب وفضة، ودهب بيلمع في كل حتة. كأنهم طالعين من مسلسل تاريخي! همست نور بصوت مبحوح وهي بتبص للبسها المقطع: "أنا فين؟" بنت من اللي قاعدين، شعرها أسود فاحم، بصت لنور بقرف وقالت بفصحى : "أخيراً أفاقت الغريبة. أخبريني يا هذه، من أي مزبلة التقطكِ الحراس؟" نور برقت عينيها: "مزبلة؟ حراس؟ إنتي بتكلمي مين يا بتاعة إنتي؟ وبعدين إيه طقم 'حريم السلطان' اللي إنتو لابسينه ده؟ أنا في كاميرا خفية صح؟ رامز جلال فين؟" البنات بصوا لبعض باستغراب. بنت تانية شقرا قالت: "ما هذا الهراء الذي تتفوه به؟ لغتها غريبة! هل بها مس من الجن؟" وقبل ما نور ترد وتفتح فيهم، باب القاعة الضخم اتفتح بصوت رعبهم كلهم. البنات سكتوا في ثانية، وكلهم وطوا راسهم في الأرض بخوف. دخلت ست في الأربعينيات، طويلة ومليانة وهيبتها تُرعب. لابسة فستان مخملي عنابي، وفي إيدها عصاية خشب بتخبط بيها على كفها بالراحة. ملامحها قاسية وعينيها بتلف في القاعة زي الصقر. بنت جنب نور همست برعب: "خاتون جولنار!" جولنار مشيت بخطوات تقيلة لحد نص القاعة، وعينيها وقعت فوراً على الكارثة اللي قاعدة على السجاد.. نور! بهدومها العجيبة وشعرها المنكوش. راحت ناحيتها بسرعة، وقفت فوقها، رفعت العصاية في وشها وزعقت بصوت يخوف: "ويحكِ! ما هذا الذي أراه؟ ما هذه الخرق البالية التي ترتدينها وتدنسين بها سجاد الحرملك؟" نور بلعت ريقها وركبها خبطت في بعض، بس لسانها متبرأ منها. وقفت على حيلها، رفعت راسها بتحدي مزيف وقالت: "خرق؟ خرق إيه يا ست إنتي؟ ده بنطلون مقطع بـ ٣٠٠٠ جنيه! وبعدين إيه حرملك وبتاع؟ إنتو مين ومين اللي جابني هنا؟!" جولنار بصت لها بذهول. مفهمتش نص الكلام، بس فهمت التحدي اللي في عينيها. لوحت بالعصاية في الهوا وصوتها رن في القاعة: "أيتها الجارية الوقحة! كيف تجرؤين على رفع صوتكِ في حضرة رئيسة الجواري؟ يبدو أن النخاس قد غشنا وأتى لنا بمجنونة! فلتصمتي قبل أن آمر الحراس بجلدكِ!" كلمة واحدة خلت الدم يهرب من وش نور.. جارية؟! النخاس؟! جلد؟! رجعت خطوة لورا وصوتها بيترعش: "جـ.. جارية إيه يا حاجة؟ أنا مهندسة نور، خريجة هندسة قسم عمارة بتقدير امتياز! جارية مين؟ أنتوا الظاهر التبس عليكم الأمر!" جولنار تجاهلتها تماماً كأنها دبانة، ولفت لباقي البنات اللي بيبصوا بشماتة، وعلت صوتها: "اسمعن يا فتيات! دعكن من هذه المعتوهة الآن. لقد جاءنا الخبر اليقين! السلطان الجديد، 'السلطان مالك شاه'، قد اعتلى عرش مصر رسمياً. وهو الليلة سيقضي ليلته الأولى في هذا القصر كحاكم مطلق للبلاد!" البنات شهقوا بفرحة وبدأوا يتهامسوا بحماس. جولنار كملت بصرامة: "لقد أمر السلطان أن يُعرض عليه الليلة أفضل الجواري، ليختار منهن جارية لترافقه في خلوته! هذه فرصتكن الذهبية! أمامكن ساعتان فقط! اذهبن إلى الحمام ، تفركن بالمسك، وارتدين أجمل الحرير! أريدكن أن تلمعن كالجواهر أمام مولانا السلطان!" البنات قاموا يجروا في كل حتة ضاحكين ومتحمسين كأنهم رايحين الجنة. أما نور.. فكانت متصلبة مكانها زي حتة التلج. كلام العجوز رن في ودنها: "ستجدين دنيا جديدة.. حيث تكونين كما كُتب لكِ..." صرخت في سرها: "يا نهار أسود ومنيل! الراجل النصاب رجعني بالزمن عشان أبقى جارية للسلطان؟ ومطلوب مني أقف في طابور عرض عشان ينقيني؟!" جولنار لفت فجأة، بصت لنور بقرف، وشاورت لخدامتين ضخام: "خذوا هذه القذرة إلى الحمام. اسلخوا هذا اللباس العجيب عن جسدها، وألبسوها حريراً يليق بالحرملك. السلطان أمر برؤية جميع الجواري الجدد، وحتى هذه المجنونة يجب أن تقف في الصف الليلة!" الخدامتين هجموا على نور ومسكوها من دراعاتها زي الكماشة. نور بدأت ترفس وتصوت وهي بتتسحب على الأرض: "لا لا لا! استنوا! سيبوني! أنا مش جارية! يا جماعة ده سوء تفاهم! أنا فيمينست! يا بابا! يا ماما! يا عريس الصالونااااااات!" يتبع بقلم الكاتبه نور محمد #عنيده_في_حرملك_السلطان #حلقه_الثانيه "يا ولية إيدك تقيلة! قولتلك مبستحماش بالليفة الخشنة دي! ده أنا بدفع دم قلبي في الروتين والـ Skin care، تيجي إنتي تسلخي جلدي يا متوحشة؟ سيبيني!" صوت نور كان جايب آخر القصر، وهي بترافس وتضرب برجليها في الهوا جوا الحمام التركي الرخامي اللي مليان بخار وريحة صابون غار ومسك. كانت بين إيدين خادمتين ضخام، واحدة اسمها مرجانة والتانية ياقوتة، حجمهم ضخام اوي! كانوا ماسكينها كأنهم بيغسلوا سجادة، مش بني آدمة. مرجانة بصت لياقوتة باستغراب وقالت بالفصحى: "ما بال هذه الجارية تصرخ بكلمات تشبه تعاويذ السحرة؟ ما هو السكين كير؟ هل هو شيطان تلبسها؟" نور، اللي وشها أحمر من الماية السخنة والفرك، زقت إيد مرجانة بالعافية وزعقت: "شيطان في عينك يا بعيدة! أنا بقولكم سيبوني! إنتو مفكرين نفسكم بتنضفوا طاجن محروق؟ أنا هرفع عليكم قضية تعذيب بدني ونفسي، والله لوديكم في داهية!" تجاهلوها تماماً، وكملوا غسيل وتلميع فيها كأنها حتة ألماظ مصدية. وبعد معاناة استمرت ساعة، طلعوها من الحمام وهي بتنهج ومستسلمة تماماً، لفوها في مناشف حرير، وقعدوها قدام مراية نحاس كبيرة. بصت نور لنفسها في المراية وتفاجأت. وشها كان منور، خدودها موردة طبيعي من البخار، وشعرها الكستنائي الطويل اللي كان منكوش، بقى ناعم وبيلمع بعد ما سرحوه وحطوا فيه زيوت ريحتها تاخد العقل. جابولها فستان من الحرير الزمردي الغامق، متطرز بخيوط دهب، وليه قصة بتحدد الوسط بطريقة تخليها تبان كأنها أميرة من حواديت ألف ليلة وليلة. بس طبعاً نور مش هتسكت: "إيه الخنقة دي؟ الفستان ضيق أوي من الوسط، أنا مش قادرة أخد نفسي! إنتو قاصدين تخنقوني؟ فين الأوفر سايز بتاعي؟ فين البنطلون اللي كنت لابساه؟" دخلت خاتون جولنار في اللحظة دي، ضربت بعصايتها على الأرض وبصت لنور بنظرة تقييم. لأول مرة، ملامح جولنار القاسية لانت ثانية واحدة لما شافت جمال نور الفاتن اللي ظهر بعد النضافة واللبس، لكنها رجعت لصرامتها وقالت: "اصمتي أيتها الثرثارة! لقد حان الوقت. مولانا السلطان في القاعة الكبرى ينتظر عرض الجواري. إياكِ وأن تتفوهي بكلمة من كلماتكِ هذه أمامه، وإلا قطعت لسانكِ وأطعمته لكلاب الحراسة! هل فهمتي؟" نور بلعت ريقها بخوف، "جينات الجبانة" اشتغلت فوراً، بس لسانها الطويل أبى يخرس، فبرطمت بصوت واطي: "كلاب حراسة؟ ليه، قاعدين في بولاق الدكرور؟" جولنار رمقتها بنظرة نارية، وشاورت للخادمات: "خذوهن إلى القاعة!" القاعة الكبرى كانت حاجة كده تخطف الأنفاس. أعمدة من الرخام الأبيض المزين بالدهب، بخور بيطلع من مباخر نحاس ضخمة، وحرس واقفين على الأبواب بسيوف بتلمع. نور كانت واقفة في صف طويل مع حوالي تلاتين بنت تانية. كلهم موطيين راسهم في الأرض، وعينيهم بتلمع بالخوف والرجاء إن السلطان يختارهم. إلا نور.. كانت بتبص حواليها بفضول واستنكار كأنها بتعاين تشطيبات الشقة! همست للبنت اللي جنبها: "بقولك إيه يا قمر.. هو إحنا هنفضل واقفين كده كتير؟ أنا ضهري وجعني، مفيش كراسي في القصر ده؟" البنت لفت وشها برعب وهمست: "اخرسي! إذا سمعك أحد الحراس سيقطعون رأسكِ! مولانا السلطان سيأتي الآن!" وفجأة، صوت طبلة قوية ضربت تلات مرات، ووراها صوت رجولي جهوري بيهز القاعة: "مولانا وسيدنا.. حاكم الديار، وسلطان الزمان.. السلطان مالك شاه!" الكل سجد على الأرض.. إلا نور. فضلت واقفة زي الألف، بتبص بفضول نحية الباب الكبير اللي اتفتح. دخل السلطان مالك. نور تنحت. حرفياً.. تنحت! نسيت استقلالها، ونسيت حقوق المرأة، ونسيت إنها مخطوفة. الراجل اللي دخل مكنش مجرد سلطان، ده كان "كارثة " ماشية على الأرض. كان طويل جداً، عريض المنكبين بطريقة تدي هيبة مرعبة. بشرته خمرية جذابة، شعره أسود فاحم واصل لحد رقبته، وملامحه حادة كأنها منحوتة بالسيف. فكه عريض، وعينيه... عينيه كانت حكاية تانية! لونها أسود عميق، فيها نظرة ثقة وغرور وثبات تخلي أجدعها راجل يرتجف قدامه. كان لابس عباية سودا قطيفة مطرزة بالفضة، وماشي بخطوات واثقة، هادية، بس بترعب. نور بلعت ريقها وقالت في سرها: "يخربيت حلاوتك! إيه المز ده؟ ده لو نزل مصر في ٢٠٢٦ هيقفل التيك توك وتويتر وإنستجرام! ده يتبروز ويتحط في الصالة! بس.. لا يا نور! اثبتي! ده متخلف رجعي بيشتري ستات! إنتي امرأة حرة مستقلة، مش هتبقي مجرد رقم في دفتر واحد مز.. أقصد واحد ديكتاتور!" السلطان مالك وقف في أول الصف. جولنار قربت منه وانحنت لحد ما لمست الأرض، وقالت بصوت مليان تذلل: "مولانا السلطان، هؤلاء أجمل زهور الحرملك، تم اختيارهن بعناية فائقة ليرضين ذوقكم الرفيع في ليلتكم الأولى في القصر." مالك هز راسه ببطء، وبدأ يمشي قدام الصف. كان بيبص للبنات بنظرة باردة، خالية من أي مشاعر. كأنه بيعاين بضاعة. النظرة دي استفزت نور جداً، ورجعتلها وعيها وكرامتها. البنات كانوا بيبتسموا برقة وبيحاولوا يبرزوا جمالهم لما يقف قدامهم، لحد ما وصل عند نور. كانت واقفة رافعة راسها، مربعة إيديها على صدرها (حركة ممنوعة تماماً)، وبتبصله بتكشيرة وتحدي. مالك وقف قدامها. عقد حواجبه باستغراب. لأول مرة من سنين طويلة، يلاقي جارية مش بتبص للأرض بخضوع، ولا بتبتسم له بتودد. دي بتبصله كأنه... كأنه حشرة مزعجة! طول في الوقفة قدامها، عينيه السودا اخترقت عينيها العسلية المتمردة. نور حست بكهربا في جسمها من نظرته، قلبها دق بسرعة، وركبها بدأت تخبط في بعضها، بس رفعت ذقنها أكتر وعاندت الخوف اللي جواها. قال مالك بصوته العميق اللي فيه بحة رجولية ترعب وتسحر في نفس الوقت: "ما بكِ تقفين هكذا وكأنكِ في ساحة معركة؟ ألا تعرفين كيف تنحنين في حضرة السلطان أيتها الجارية؟" نور مقدرتش تمسك لسانها أكتر من كده، وانفجرت: "أولاً، اسمي المهندسة نور، مش أيتها الجارية! ثانياً أنا مبنحنيش غير لربنا، مش لواحد ماشي ينقي في بني آدمين كأنه بيشتري بطيخ من السوق! إيه قلة الذوق دي؟" القاعة كلها شهقت بصوت واحد! البنات حطوا إيديهم على بؤهم برعب. الحراس حطوا إيديهم على سيوفهم. وجولنار؟ جولنار تقريباً جالها هبوط حاد في الدورة الدموية، وجريت ناحية السلطان وهي بتترعش: "مولانا! العفو يا مولاي! إنها معتوهة! فقدت عقلها في الطريق! سآمر بقطع رأسها فوراً جزاء وقاحتها!" مالك رفع إيده بهدوء، حركة واحدة منه خلت جولنار تخرس وتتسمر في مكانها. فضل باصص لنور، وملامحه ماتغيرتش، بس كان في لمعة غريبة في عينيه.. لمعة تسلية! قرب منها خطوة كمان لحد ما بقى فارق الطول بينهم واضح جداً، هو زي البرج وهي مضطرة ترفع راسها عشان تبصله. قال بصوت واطي ومستفز: "مهندسة؟ بطيخ؟ لغتكِ غريبة ومضحكة... ولسانكِ سليط جداً على جارية من المفترض أن ترتجف رعباً الآن." نور بلعت ريقها بخوف حقيقي المرة دي. هيبته من قريب مرعبة، ريحته اللي خدرت حواسها لثانية، بس حاولت تتدارك الموقف وتتكلم بشجاعة مزيفة: "أنا مبخافش! وبعدين أنا قولتلك أنا مش جارية، أنا مخطوفة، ولو سمحت يعني افتحلي الباب ده وخليني أمشي، أنا ورايا مستقبل ومشاريع متعطلة!" مالك ابتسم... ابتسامة جانبية خفيفة جداً، بس كانت كفيلة تخلي قلب نور يوقع في رجليها من سحرها ورعبها في نفس الوقت. ميل عليها شوية وهمس جنب ودنها بصوت خشن: "ليس هناك من يخرج من قصر السلطان مالك حياً إلا بأمري.. وأنتِ، أيتها المتمردة الصغيرة المعتوهة..." اعتدل في وقفته، وبص لجولنار اللي كانت هتموت من الرعب، وقال بصوت عالي حاسم سمعته القاعة كلها: "جهزوها... هي من سترافقني الليلة في جناحي الخاص." الكلمة نزلت كالصاعقة! البنات بصولها بحقد وذهول، وجولنار فتحت بؤها ومش قادرة تنطق. أما نور؟ نور اتصدمت صدمة عمرها. "نعم يا أخويا؟! يجهزوا مين؟ الليلة إيه وجناح إيه؟ إنت فاهم الموضوع غلط! يا أستاذ مالك! يا كابتن!" لكن مالك كان لف ضهره ومشي بخطواته الواثقة برا القاعة، من غير ما حتى يلتفت لصراخها. في ثواني، الخادمات هجموا عليها تاني، شالوها من على الأرض وهي بترافس وتصوت: "سيبوني! ده أنا أموته وأموت نفسي! أنا معنديش الكلام ده! يا جولنار إلحقيني أنا مجنونة وبِعض! يا جماااااعة!" بعد نص ساعة من المقاومة الفاشلة، نور لقت نفسها بتترمي جوا غرفة واسعة جداً. الباب الخشبي الضخم اتقفل وراها واتقفل بالمفتاح من برا! الأوضة كانت خيالية، مليانة شموع، سرير ضخم في النص عليه ستائر حرير، وفي ترابيزة عليها فواكه ومشروبات، وريحة الأوضة بتسلب العقل. بس نور مكنتش في حالة تسمح لها تتأمل. قامت وقفت بسرعة، قلبها بيدق زي الطبلة، مرعوبة بجد المرة دي. الجبن سيطر عليها بالكامل. "يا لهوي يا لهوي! ده هيعلقني على باب زويلة! أعمل إيه؟ أهرب إزاي؟" جريت على الباب فِضلت تخبط عليه وتزقه، مفيش فايدة. جريت على الشباك، لقته عالي جداً وتحته حراس. وفجأة، سمعت صوت خطوات تقيلة جاية من برا.. خطواته هو! وصوت المفتاح بيتحط في الباب. نور اتجننت، عينيها لفت في الأوضة تدور على أي س/لاح. ملقيتش قدامها غير ڤازة نحاس ضخمة وتقيلة جداً محطوطة على ترابيزة صغيرة. شالتها بالعافية، ووقفت ورا الباب، رافعة الڤازة فوق راسها، بتنهج وعينيها بتطق شرار وخوف. الباب بدأ يفتح ببطء.. وظهر خيال السلطان مالك العريض على الأرض. نور شدت على أسنانها، وغمغمت بخوف وإصرار: "والله لو قربت مني لأفلق دماغك وأعملك شاورما يا مز إنت.. يا أنا يا أنت الليلة دي يا مالك!" الباب اتفتح بالكامل، وخطى السلطان خطوته الأولى لداخل الجناح، وهو مش متخيل الكارثة اللي مستنياه ورا الباب... يُتبع...بقلم الكاتبه نور محمد #عنيده_في_حرملك_السلطان #الحلقه_الثانيه مساء الخير ياقمرات ايه رأيكم في حلقه النهاردا 🥹♥ تتوقعوا نور هتعمل ايه مع السلطان ورد فعله هيكون ايه 🙃

مقالات ذات صلة

نهايه الافاعي مني السيد

حكايه طارق وسلمي الجزء الرابع للكاتبه سهر محمد

في شهر العسل

بنتي ومراتي ابني حكايات منال على ج 2

حكايه رحمه للكاتبه سهر محمد

اخويا حكايات ندى الجمل

اترك تعليقاً إلغاء الرد