بعد الطلاق
وحالق دقنه وشكله رجع بني ادم تاني
الطلبة بتوعه اول ما شافوه بالمنظر ده سقفوله في الطابور والمدرسين كلهم حضنوه
المدير طلع في الميكروفون وقال يا ولاد النهاردة عندنا درس اهم من التاريخ درس في ازاي البني ادم لما يتظلم ويسكت ويرضى بقضاء ربنا ربنا بيرجعله حقه ولو بعد حين
بعدها باسبوع حصلت حاجة مكنتش عاملة حسابها خالص
كنت قاعدة في البيت برضع بنتي الصغيرة لقيت ماما بتتصل بيا وبتعيط
قالتلي الحقينا اخوكي معموله محضر في القسم
اټخضيت قلتلها محضر ايه
قالتلي محضر تحرش بواحدة زميلته في الشغل
قلتلها ايه
قالتلي البت دي راحت اشتكت انه بيضايقها في الشغل وانه هددها لو متكلمتش معاه هيطردها
ساعتها حسيت ان الدنيا بتلف بيا نفس التهمة بالظبط اللي هما لبسوها لطليقي من تلات سنين
جريت على القسم لقيت اخويا قاعد هناك ووشه في الارض
سألته ايه اللي حصل
قالي والله ما عملت حاجة انا كنت بهزر معاها وهي فهمتني غلط
قلتله بتهزر ازاي يعني
قالي كنت بقولها كلام عادي
قلتله نفس الكلام العادي اللي لبستوه لطليقي ودمرتوا حياته بيه
سكت ومعرفش يرد
دخلت للظابط وحاولت افهم ايه اللي حصل الظابط قالي اخوكي متهم بالتحرش اللفظي وټهديد زميلته والبنت معاها تسجيلات
ساعتها افتكرت طليقي لما كان بيقولّي كنت خاېف لو موافقتش على الطلاق يشوهوا سمعتك في شغلك نفس الكلمة بالظبط
كلمت طليقي وانا بعيط وقلتله الحقني اخويا معموله محضر بنفس التهمة اللي انت اتهمت بيها
سكت شوية وبعدين قالي سبحان الله ربنا كبير
قلتله تعالى معايا القسم عايزاك تشوف بعينك ان اللي عملتوه فيك بيترد لاخويا دلوقتي
قالي لا مش هاجي انا مش عايز اشمت في حد
قلتله مش شماتة انا عايزاك تقول كلمة حق
قاللي كلمة حق ايه
قلتله تقول ان التهمة دي سهل اي حد يلبسها لاي حد وانها ممكن تدمر حياة بني ادم
راح معايا القسم وهو لابس بدلة المدرسة بتاعته ودخل للظابط وقاله يا فندم انا كنت مدرس واتهمت بنفس التهمة دي ظلم من تلات سنين وضاع من عمري تلات سنين في الشارع بلم كانزات عشان تهمة كدب فلو سمحت اتأكد كويس قبل ما تظلم حد تاني
الظابط بصله وبص لاخويا وقاله انت تعرف الراجل ده
اخويا رفع راسه وشاف طليقي ووشه جاب الوان واتكسف يبصله
طليقي بص لاخويا وقاله انا مسامحك على اللي عملته فيا بس اتعلم من اللي حصلّي متعملش في بنات الناس اللي اتعمل فيا
اخويا قام من على الكرسي ووطى على ايد طليقي يبوسها وطليقي شده وحضنه وقاله قوم انت لسه صغير واتعلم من غلطتك
البنت اللي كانت عاملة المحضر لما سمعت الحكاية وشافت المنظر ده تنازلت عن المحضر وقالت انا بس كنت عايزاه يبعد عني مش عايزاه يتسجن
طلعنا من القسم واخويا ماشي جنب طليقي وراسه في الارض
طليقي طبطب عليه وقاله بص يا ابني انا اترميت في الشارع تلات سنين بسبب كلمة كدب اتقالت عليا فمتقولش كلمة لاي واحدة ست الا وانت متأكد انها هتتقبلها
اخويا قاله انا اسف انا اسف على كل حاجة عملتها فيك
ومن يومها اخويا اتغير 180 درجة بقى بني ادم تاني خالص بقى يحترم كل الناس وبقى كل ما يشوف طليقي في الشارع يجري يسلم عليه ويقوله يا استاذي
اما اهلي فبابا بقى كل يوم جمعة يعدي على طليقي في شقته ياخدله فاكهة ويقعد معاه ساعة يشربوا شاي ويتكلموا في التاريخ اللي طليقي بيحبه
وماما بقت كل ما تطبخ حاجة حلوة تبعتلي طبق اقوله وديه لطليقك خليه ياكل اكل بيتي نضيف بدل اكل المطاعم
وانا بقيت كل ما
اشوف طليقي واقف في الفصل بيشرح للطلبة وبيضحك معاهم افتكر شكله وهو بيدور في الژبالة وبيقولّي انا عملت كل حاجة عشان احميكي
وعرفت ان ربنا مبيسيبش حق حد وان اللي بيضحي عشان حد ربنا بيعوضه اضعاف وان اللي بيظلم حد لازم ييجي يوم ويشوف نفس الظلم بعينه عشان يحس بۏجع اللي ظلمه
والنهاردة بعد سنة كاملة من اليوم اللي شفته فيه في الشارع طليقي اتجوز مدرسة معاه في نفس المدرسة ست طيبة وبنت حلال وعزمنا كلنا على الفرح وانا وجوزي واهلي واخويا رحنا كلنا وقعدنا نرقص ونغني كأننا اهل بجد
وهو واقف في الكوشة جنب عروسته بصلي وشاورلي بايده كأنه بيقولي شكرا انك رجعتيلي حياتي
وانا شاورتله ودموعي نازلة بس المرة دي دموع فرح مش دموع حزن
عشان فهمت ان الحب مش لازم يبقى جواز الحب ممكن يبقى انك تقف جنب حد لما الدنيا كلها تسيبه وانك ترجعله كرامته لما الناس تدوس عليها وانك تسامحه حتى وهو مظلوم
