روايه انا لها عاشق بقلم نور محمد الحلقه الاولى

الحلقه الاولى بقلم نور محمد — "أنا أسعد وحدة في الدنيا يا دياب.. فارس جالي إنه رايدني وعيطلب يدي من عمي العمدة.. أنا بحبه قوي يا دياب، بحبه جوي، أخيرًا هبجى مرته!" كلمات بسيطة خرجت من ثغرها الباسم من تلت سنين، كانت كفيلة إنها تدبح قلب "دياب" بسكين بارد. يومها كان رايح ومجهز نفسه يصارحها بعشقه اللي كبر معاها من وهي طفلة بضفاير بتجري تستخبى في حضنه، يومها كان رايح يقولها إن ابن العمدة رايد بنت الغفير وشارب من كاس حبها.. لكن القدر سبقه، وضربته جات من أقرب الناس ليه.. أخوه الصغير "فارس"، ومن البنت اللي اعتبرته طول عمرها "أخوها الكبير" وبس. تلت سنين مرت على اليوم المشئوم ده، تلت سنين هرب فيهم دياب من الصعيد كله بحجة شغل المقاولات في مصر وإسكندرية، عشان عيونه متشوفش زفتها على أخوه، عشان ميلمحش ضحكتها وهي في حضن غيره. بس اضطر يرجع.. رجع وخطوته تقيلة بتدب على أرض السرايا في قنا، بعد ما الخراب عم الأراضي والمصالح بسبب طيش "فارس" اللي استلم كل حاجة ورا أخوه وضيعها على مزاجه وكيفه ونسوانه. دخل دياب من بوابة السرايا الكبيرة، هيبته تسبقه، جلابيته الصعيدي وعمته اللي بتزيده وقار، ووشه اللي ملامحه بقت أقسى وأصلب من الحجر. رفع عيونه لمحها.. "غزل". واقفة في الجنينة، بتسقي الورد، ملامحها دبلانة، الحزن واكل من حُسنها حتة، والضحكة اللي كانت بتنور وشها اختفت. أول ما شافته، عينيها وسعت بفرحة، سابت الخرطوم من إيدها وجريت عليه زي ما كانت بتعمل زمان: — دياب؟! حمد الله على السلامة يا خوي! نورت دارك وبلدك من تاني. قلبه انتفض بين ضلوعه، ريحتها اللي بتفكره بأيام طفولتهم هجمت عليه، كان نفسه يمد إيده وياخدها في حضنه، يطمنها، يسألها إيه اللي دبل وردتك إكده؟ لكن كبرياءه ووجعه كانوا أقوى. رسم الجفاء على وشه، واتكلم بصوت خشن، بارد، كأنه بيكلم غريبة: — الله يسلمك يا مرت أخوي.. الدار منورة بأهلها. أومال فين فارس؟ غزل تراجعت خطوة لورا، الابتسامة اتجمدت على شفايفها، الكلمة رنت في ودانها "مرت أخوي".. والجفاء اللي في صوته كان غريب عليها. دياب اللي كان حارسها وضِلها، بيكلمها كأنه ميعرفهاش! بلعت ريقها وردت بصوت مهزوز: — فارس نايم في مجعده.. لساته راجع وش الفجر. — نايم لوش الضهر! عمار يا سرايا العمدة. قالها دياب بسخرية لاذعة، وسابها ومشي بخطوات سريعة ناحية باب السرايا، من غير حتى ما يبصلها تاني. وقفت غزل مكانها، الدموع اتجمعت في عينيها. همست لنفسها بحسرة: — اتغيرت قوي يا دياب.. للدرجادي كرهتني؟ تلت سنين متسألش عليا حتى في التليفون، ولما ترجع تعاملني إكده؟ باين عليك مبجتش طايق تشوف وشي. اللي غزل مكنتش تعرفه، إن دياب عمره ما غاب عنها يوم. كان بيكلم الغفرا، وبيكلم دادات السرايا، يعرف أخبارها، أكلت ولا لأ، خرجت ولا لأ، كانت بتنام وهو سهران يحرس طيفها من بعيد. ولما عرف بليالي فارس الحمرا، وقلة أصله معاها، نار الدنيا قادت في قلبه، ونزل قنا مخصوص عشان يربيه. في المندرة (المقعد)، الباب اتفتح بغشومية، دياب دخل لقى فارس نايم بجلابيته، ريحة الدخان مالية المكان. ضرب دياب بعصايته على الترابيزة الخشب ضربة رعبت فارس وخلته يفز من مكانه. — جوم فز يابن العمدة! جوم يا كبير السرايا اللي سايب مال أبوه يتاكل، وعِرضه يتهان! فارس مسح وشه بضيق وهو بيتعدل: — إيه يا دياب؟ داخله زريبة انت؟ عتزعج إكده ليه عالصبح؟ حمد الله عالسلامة الأول. — الله لا يسلمك من كل شر يا فارس! إيه الخراب اللي واصلني ديه؟ الأراضي بارت، والمحاصيل اتسابت، والناس بتشكي طوب الأرض من قلة حيائك وسهرك في البنادر مع الغوازي! فارس وقف وبصله ببرود مستفز: — شغل إيه ومحاصيل إيه! إحنا فلوسنا تاكلها النيران متخلصش. بعدين أنا حر، أعمل اللي على كيفي، أعيش سني وأتبسط. دياب قرب منه، مسكه من ياقة جلابيته وعينيه بتطق شرار: — تتبسط على حساب اسمنا وسمعتنا؟ تتبسط وتخون الأمانة؟ بتخون اللي أمنتك على جلبها وروحها يابن أبوي؟ مفكرني مش خابر بلاويك ونسوانك اللي بتجيبهم من ورا مرتك؟ فارس زق إيد دياب ببرود ونفض هدومه: — اااه.. جول إكده بجى. انت زعلان عشان غزل! اسمع يا دياب، دي حياتي وأنا حر فيها، ملكش دخل عندي. غزل دي مرتي أنا، وأنا أعمل اللي يريحني.. وهي عاجبها إكده وراضية، هتدخل انت ليه؟ دياب كور إيده، كان هينزل بيها على وش أخوه يكسرله سنانه، لكن صورة غزل وضحكتها يوم ما قالتله "بحبه يا دياب" وقفته. كتم غضبه بالعافية، وهو بيجز على أسنانه: — لو راجل بجد، كنت راعيت ربنا في اللي اتيتمت ومالهاش غيرنا.. بس قسما بعزة جلال الله يا فارس، لو سمعت إنك مأذيها بشعرة، أو دمعة نزلت من عينيها بسببك، لكون كاسرلك الجلب اللي فرحان بيه ديه. لم الدور، واعدل حالك، بدل ما أعدلهولك أنا بطريجتي! ساب دياب المندرة وخرج، ساب فارس بيضحك باستهزاء ولا كأنه سمع حاجة. دياب سكت ومفضحش أخوه قدام غزل، كان خايف يكسر قلبها، خايف تشوف الحقيقة المرة وتتوجع، فضل إنه يشيل هو الوجع، ويسكت. مرت أيام، ودياب بيعامل غزل بقمة الجفاء. يتجنب القعدة معاها، يرد على قد الكلمة، ولو لمحها في مكان يسيبه ويمشي. غزل قلبها كان بيتقطع، حست إنها خسرت الأب والأخ والسند الحقيقي ليها في الدنيا. لحد ما جه اليوم اللي انكشف فيه المستور. غزل كانت بترتب هدوم فارس في الدولاب، لقت تليفونه التاني اللي بيخبيه دايماً مفتوح، رسالة ورا رسالة، صور، رسايل صوتية مع واحدة من بنات الليل في البندر. وعود بهدايا وسفريات، وكلام بيطعن في شرف غزل نفسها.. سمعت رسالة بصوت فارس بيقول فيها: "غزل إيه يا بت! دي مجرد حتة بت غفير، يتيمه، أخدتها شفجة وعشان تخدم في السرايا، لكن الجلب والروح ليكي انتي يا جمر." التليفون وقع من إيدها. الأرض لفت بيها. كل الحب اللي ادتهوله، كل التضحيات، صبر على سهر وإهمال، وفي الآخر هي "بنت الغفير اللي واخدها شفقة"؟ دموعها منزلتش، دي اتحجرت في عينيها من الصدمة. نزلت تجري على السلم، شافت فارس لسه داخل من باب السرايا بيضحك. وقفت قدامه، وبصوت مليان قهر يهد جبال صرخت: — بتخوني يا فارس؟ بتخون غزل اللي رضيت بيك وبعيوبك وبسهرك وقلة سؤالك؟ فارس ملامحه اتغيرت، بص حواليه بتوتر، بس لما لقى السرايا فاضية، رجعله جبروته: — وطي صوتك يا بت المجانين انتي! إيه اللي بتجوليه ديه؟ — بجول اللي سمعته وعرفته! التليفون التاني اللي مخبيه.. الهوانم اللي بتصرف عليهم فلوسك وعرضك.. وأنا اللي فاكراك سندي، طلعت خاين.. خاين وجبان! طلقني يا فارس.. أنا مش هجعد على ذمتك دجيجة وحدة تاني! فارس ضحك بصوت عالي، ضحكة مستفزة خلت الدم يغلي في عروقها، وقرب منها ومسك دراعها بعنف: — أطلجك؟ انتي اتخبطي في نافوخك يا بت؟ أطلجك عشان تروحي فين؟ للشارع؟ انتي ناسية أصلك ولا إيه؟ انتي حتة بت غفير، يتيمة، لا أب ولا أم ولا ضهر تتسندي عليه. المفروض تبوسي إيدك وش وضهر إني مأويكي في سرايا العمدة.. تاكلي وتشربي وتلبسي، وتكتمي خشمك ديه خالص.. عجباكي العيشة إكده أهلاً وسهلاً، مش عجباكي، اخبطي راسك في أتخن حيطة في قنا كلها! الكلمات نزلت على غزل زي الكرابيج. حسّت بضعفها، بقلة حيلتها. كلامه صح، هتروح فين؟ مين هيحميها؟ دياب اللي كان بيحميها زمان دلوقتي بيكرهها ومبيكلمهاش، ولو عرف ممكن يطردها هو كمان. دموعها نزلت بكسرة، هدت حيلها، رفعت عينيها في الأرض، ولسه هتسحب دراعها باستسلام وذل... — وهي ملهاش عازة صُح.. بس ليها ضهر يكسر وسط اللي يفكر يمسها بكلمة! الصوت رن في بهو السرايا زي الرعد. صوت رج الأرض تحت رجلين فارس. غزل رفعت عينيها بذهول، وفارس لف وشه برعب. كان "دياب". واقف على أول السلم، عينيه بتغلي زي بركان انفجر بعد سنين من الخمود. خطواته نازلة السلم ببطء بس كل خطوة كانت بتدب في قلب فارس الرعب. دياب كان زي الأسد اللي شاف فريسته بتتهان. قرب منهم، وبحركة وحدة سريعة وقوية، مسك إيد فارس اللي ماسكة دراع غزل، ولواها ورا ضهره، خلى فارس يصرخ من الألم. دياب سحب غزل وراه، خلاها في ضهره، في حمايته، زي ما كان بيعمل وهي طفلة. — دياب! انت اتجننت؟ بتكسر إيدي عشان دي؟ فارس صرخ بوجع. دياب ضربه بالرجل موقعه على الأرض قدامه، ووقف فوق راسه وهو بينهج من الغضب: — دي تسواك وتسوى عيلتك كلها يابن أبوي! جولتلك ميت مرة حافظ على النعمة اللي في إيدك، بس انت طلعت لا بتصون نعمة ولا بتعمر بيت. بتعايرها إنها يتيمة؟ بتعايرها بكسرة ضهرها؟ قسماً بالله لو ما كنت أخوي لكانت رصاصة من طبنجتي استقرت في نفوخك الفاضي ديه! غزل كانت واقفة ورا دياب، بتبكي بصمت، مذهولة من اللي بيحصل. دياب؟ دياب اللي بيكرهها بيدافع عنها؟ دياب اللي بقاله أيام مبيبصلهاش، دلوقتي واقف قدام أخوه زي الجبل عشانها؟ فارس وهو بيحاول يقوم من على الأرض، وشه أحمر من الغيظ والإحراج: — انت بتتدخل ليه يا دياب؟ مرتي وأنا حر أأدبها! بعدين انت محموج عليها إكده ليه؟ تكونش لساتك فاكر أيام المرجحة واللعب في الجنينة؟ دي مرتي، وحتفضل مرتي ورجلها فوج رجبها! عينين دياب اسودت، البركان انفجر تماماً. سحب من حزامه سلاحه الشخصي (الطبنجة) ووجهها في وش فارس. غزل صرخت: — دياااااب! لااا! لكن دياب متهزش، صوته خرج جهوري، مرعب، حاسم: — هتطلجها يا فارس. فارس بلع ريقه بخوف وهو باصص لفوة السلاح: — انت بتجول إيه يا دياب؟ أطلج مرتي؟ السلاح ديه بتشهره في وش أخوك عشان دي؟ — جولتلک هتطلجها.. دلوقتي، وحالاً.. ورجلك فوج رجبك! انطج يابن أبوي، انطج الكلمة بدل ما أخلي جنازتك تسبج طلاجها! فارس بص لغزل اللي واقفة ورا دياب، وبعدين بص لدياب اللي مفيش في عينيه أي ذرة تراجع. عرف إن دياب مبيتهددش، وإنه فعلاً ممكن يقتله. وبصوت مهزوز، مليان حقد وضعف، قال: — انتي طالج يا غزل.. طالج. الكلمة نزلت على غزل، حسّت وكأن جبل انزاح من على صدرها، وفي نفس الوقت الأرض بتنهار بيها. دياب نزل سلاحه بالراحة، ورجعه مكانه، وبص لفارس باشمئزاز: — تلم خلاجاتك، وتغور من السرايا دي. مشفش وشك إهنه لا النهاردة ولا بكرة لحد ما أشوفلك صرفة. غور! فارس قام ينفض هدومه، رمق دياب بنظرة غل، ورمق غزل بنظرة احتقار، وخرج بره السرايا كلها. الصمت نزل على المكان. مفيش غير صوت أنفاس دياب العالية، وصوت عياط غزل المكتوم. دياب لف ببطء. بص لغزل. عينيها كانت مليانة دموع، حيرة، وصدمة. لأول مرة من تلت سنين، تلتقي العيون بجد. لأول مرة من تلت سنين، غزل تشوف في عين دياب نظرة مألوفة.. نظرة "دياب الحارس"، دياب الأمان، بس كان فيها حاجة تانية المرة دي، حاجة أعمق من الأخوة، حاجة حسستها برجفة في قلبها. — ليه يا دياب؟ همست بيها غزل وصوتها بيرتجف، والدموع بتنزل على خدودها: — ليه عملت إكده؟ ليه طلجتني منه؟ انت مش كنت بتكرهني ومبطيقش تبص في وشي؟ ليه وقفتله وخليته يرمي عليا اليمين؟ أنا دلوقتي بقيت في الشارع بجد. دياب قرب منها خطوة. قلبه كان بينزف على دموعها، بس في نفس الوقت كان بيرقص إنها أخيراً اتحررت من الكابوس اللي كانت عايشة فيه. مد إيده الخشنة، وبأطراف أصابعه مسح دمعة نزلت على خدها، في حركة خلت غزل تتجمد مكانها من المفاجأة. وبصوت هادي، عميق، مليان حنان دافيها زي شمس الشتا، قالها: — الشارع ديه للي ملوش دياب يا غزل.. وطول ما فيا عِرق بينبض، إنتي صاحبة السرايا دي، واللي يفكر يقلل من مجامك، أهد المعبد على راسه. كرهتك؟ أنا عمري ما كرهتك.. أنا كرهت ضعفي، وكرهت غبائك اللي خلاكي تختاري الغلط. سكت لحظة، وعينيه بتغوص في عينيها بطريقة خلت أنفاس غزل تضطرب: — بس خلاص.. الغلط اتصلح.. ومن النهاردة، مفيش غير الصح اللي كان لازم يحصل من تلت سنين. غزل بصتله بصدمة، قلبها دق بعنف مش فاهماه: — جصدك إيه يا دياب؟ ابتسم دياب ابتسامة خفيفة، غامضة، وقال: — خشي ارتاحي يا غزل.. كلامنا لسه مبدأش. — "إنتي لساتكي بتبكي يا حبة عيني؟ عتبكي على إيه ولا على مين؟ على اللي رخصك وخانك؟ ولا على حظك المايل؟ امسحي دموعك دي يا غزل، دموعك غالية وماتنزلش على خسيس." دادة "زينب"، العجوز اللي ربت غزل ودياب وفارس، دخلت الأوضة بصينية الفطار، لقت غزل قاعدة على السرير، ضامة ركبها لصدرها وعينيها وارمة من العياط طول الليل. غزل رفعت عينيها الحمرا وردت بصوت مبحوح ومرتجف: — مببكيش عليه يا دادة... فارس خلاص طلع من جلبي من ساعة ما شفت خيانته بعيني وسمعت إهانته بودني. أنا ببكي على حالي.. على يُتمي اللي كسرني وخلاني حمل تقيل عليهم، ببكي على طردة فارس، وببكي على كسرتي وأنا مش عارفة هروح فين بعد ما عدتي تخلص. دادة زينب حطت الصينية على الترابيزة وقربت منها، خدتها في حضنها وطبطبت على ضهرها: — تروحي فين إيه عاد؟ إنتي عتخرفي تجولي إيه؟ سرايا الهواري دي سرايتك جبل ما تكون سرايتهم، وإنتي خابرة إكده زين. — سرايتي بصفة إيه يا دادة؟ أنا كنت مرت ابنهم، ودلوك بجيت طليجته.. مليش جعدة إهنه، الناس تاكل وشنا.. دياب نفسه مش هيسمحلي أجعد. زينب ضحكت ضحكة خفيفة فيها سخرية: — دياب؟ هو إنتي لساتكي عميا يا بتي؟ دياب بيه اللي شال أخوه من الأرض شيل ورمالكي يمين الطلاج غصب عنه عشان يحفظ كرامتك، عيطلعك بره السرايا؟ دياب اللي كان جافل على روحه تلت سنين في البندر، وأول ما شم خبر إن فارس مزعلك، نزل كيف القضا المستعجل يربيه.. عيطلعك؟ غزل بعدت عن حضن زينب وبصتلها باستغراب وحيرة: — جصدك إيه يا دادة؟ دياب بيكرهني.. دياب مجاليش مبروك حتي يوم فرحي، تلت سنين متصلش بيا ولا مرة.. ولما رجع كان بيعاملني جني حشرة ماشية في السرايا.. دياب اتدخل امبارح عشان شرف العيلة واسم الهواري مش عشاني أنا. زينب ضربت كف على كف بحسرة: — يا مُرك يا زينب في بهايمتك يا بتي! شرف عيلة إيه؟ دياب بيه عمره ما كرهك.. دياب هج من البلد يوم ما وافجتي على فارس لأن جلبه انكسر! إنتي مفكرة دياب كان بيعاملِك جاف ليه الأيام اللي فاتت؟ عشان خايف يبصلك يضعف، خايف يشوفك مرت أخوه وحبيبته في نفس الوجت. دياب بيه عاشقك من وانتي بضفاير يا غزل، بس إنتي اللي عيونك كانت معماية بفارس وطيشه. غزل قلبها دق بسرعة رهيبة، الكلام نزل عليها زي الصاعقة، كأن شريط حياتها كله بيتعاد قدام عينيها. خوف دياب عليها زمان، حمايته ليها، نظرته اللي كانت بتلاحقها في كل مكان، كلمته امبارح: "الشارع ديه للي ملوش دياب". بلعت ريقها بصعوبة وهمست: — لا يا دادة.. مستحيل.. دياب طول عمره أخوي الكبير، حتي لو كلامك صُح.. أنا دلوك بجيت طليجة أخوه! مستحيل دياب يبصلي.. ومستحيل أنا أجعد في السرايا دجيجة وحدة.. أنا لازم أمشي من إهنه. زينب قامت ووقفت بحزم: — تمشي تروحي فين؟ لعمك "رضوان" اللي كل همّه الفلوس واللي كان عيرميكي لأي راجل عجوز عشان جِرشين؟ اسمعي يا بتي.. دياب بيه لو عرف إنك بتفكري إكده، عيخرب الدنيا فوج دماغنا كلياتنا. افطري وصلي ركعتين واهدي إكده. سابتها زينب وخرجت، وغزل فضلت مكانها، دماغها بتلف زي الدوامة، كلام دادة زينب فتح بيبان في قلبها كانت مقفولة ومتربسة بالضبة والمفتاح. تحت في الجنينة، الصوت كان عالي. فارس كان واقف بره البوابة الحديد، بيزعق وبيشتم، والغفرا واقفين مش عارفين يعملوا معاه إيه. — افتح ياد منك ليه! إنتوا عتمنعوني أدخل سراية أبوي؟ جرا إيه يا شوية كلاب، أنا فارس الهواري! صوت فارس كان جايب آخر الشارع. فجأة، الباب الخشب الكبير بتاع المندرة اتفتح، وخرج منه "دياب" بخطواته الثابتة، هيبته تخرس أي صوت. كان لابس جلابية صعيدي سودا، وماسك عصايته الأبنوس. شاور للغفرا بإيده، ففتحوا البوابة الحديد شوية عشان فارس يدخل. فارس دخل وهو بينفخ ووشه أحمر من الغيظ: — عتطردني من بيت أبوي يا دياب؟ وتخلي الغفرا يمنعوني أدخل؟ دياب وقف قدامه، عينيه بتطق شرار، وبصوت هادي بس مرعب قال: — بيت أبوك ديه أنا اللي بانيه طوبة طوبة بتعبي وشجاي، أبوك سابلك أرض بور وديون طالت الرجبة، وأنا اللي سددتها. بيت أبوك ديه يلم الرجالة، ميلمش العيال الخاينة اللي متصونش العِرض. فارس جز على سنانه وصرخ: — أنا ليا ورث في السرايا دي وفي الأراضي.. وهاخد حجي تالت ومتلت، وهبيع نصيبي للغريب عشان أكسر عينك يا دياب! دياب ضحك بسخرية لاذعة، ضرب بعصايته على الأرض وقال: — ورث؟ ورث إيه يابو ورث؟ إنت ناسي إن أبوك جبل ما يموت باعلي كل حاجة بيع وشرا عشان خابر زين إنك صايع وهتضيع شقاه على الرجاصلت؟ أنا اللي كنت بديك مصروفك يا فارس.. الأراضي والسرايا باسم دياب الهواري.. وكنت سايبك تبرطع فيهم بمزاجي.. بس دلوك، مفيش ليك عندي غير مليمين تاخدهم كل شهر عشان متمدش إيدك للناس وتفضحنا. فارس عينيه وسعت بصدمة، مكنش مصدق إن دياب لسه ماسك كل الخيوط في إيده. — إنت بتجول إيه؟ يعني أنا مليش حاجة إهنه؟ بتطردني عشان خاطر حتة بت يتيمة؟ دياب مسك فارس من ياقة جلابيته فجأة، وقربه منه لدرجة إن فارس شم ريحة الموت في أنفاس دياب: — جيبت سيرتها على لسانك الزفر ديه تاني، هجطعهولك! غزل دي ستك وتاج راسك.. إنت رميت يمينك عليها، يعني مبجتلكش حاجة، لا هي تخصك ولا السرايا دي تخصك. غور من وشي دلوك، روح للغوازي بتوعك، ولم الدور عشان لو لمحت خيالك جريب من السرايا دي، هطخك عيارين أخلص الدنيا منيك. زقه دياب بعنف، فارس رجع لورا وكاد يقع. بص لدياب بكره وغل ملوش حدود. — ماشي يا دياب.. ماشي.. أنا هعرف إزاي أحرِج جلبك، وورحمة أبوي ما هسيبك تتهنى بيها! لف فارس وخرج من البوابة، ودياب واقف مكانه، عينه بتتابعه لحد ما اختفى، وهو عارف إن فارس جبان، بس الجبان لما بيتزنق ممكن يغدر. بليل، السرايا كانت هادية، النور خافت. دياب كان قاعد في مكتبه (المندرة)، بيراجع شوية أوراق وحسابات الأراضي اللي باظت في غيابه. الباب خبط بالراحة. — ادخل. قالها دياب وهو لسه باصص في الورق. الباب اتفتح، ودخلت غزل. كانت لابسة إسدال أسود بيزيد ملامحها هدوء وحزن، وفي إيدها فنجان قهوة مظبوط زي ما دياب بيحبه دايماً. ريحة القهوة ملت المكان، وخلت دياب يرفع عينه بسرعة. أول ما شافها، ملامحه القاسية لانت لا إرادياً، ساب القلم من إيده وبصلها بصمت. غزل حطت القهوة على المكتب بخجل، وبصت في الأرض: — جولت أعملك جهوتك.. خابرة إنك بتحبها من إيدي. دياب فضل باصصلها ثواني، وبعدين اتكلم بصوت دافي جداً: — تسلم إيدك يا غزل.. اتفضلي اجعدي، واجفة ليه؟ غزل قعدت على الكرسي اللي قدام المكتب، فركت إيديها بتوتر، وبعدين رفعت عينيها في عينيه بشجاعة: — أنا جيت أشكرك يا دياب.. على كل اللي عملته عشاني امبارح. لولاك كنت زماني مذلولة ومكسورة الجناح.. إنت رجعتلي كرامتي اللي فارس داس عليها. دياب شرب شفطة من القهوة، وابتسم ابتسامة خفيفة: — كرامتك من كرامتي يا غزل.. إنتي متربية في السرايا دي، واسم الهواري شايلك زي ما شايلني. مفيش شكر بيناتنا. غزل سكتت شوية، بلعت ريقها وبدأت تتكلم في الموضوع اللي واكل عقلها طول اليوم: — أنا جيت أستأذنك يا دياب.. أنا هجعد إهنه لحد ما شهور العدة بتاعتي تخلص.. وبعدها هلم خلاجاتي وأروح أشوفلي أي مكان أعيش فيه.. أو أروح عند عمي رضوان. دياب أول ما سمع كلمة "عمي رضوان" و"أمشي"، الفنجان كان هيتكسر في إيده من شدة قبضته. ملامحه اتغيرت 180 درجة، قام من على كرسيه ببطء، ولف المكتب لحد ما وقف قدامها. غزل رجعت بضهرها لورا بخوف من نظرته. — تعيدي اللي جولتيه ديه تاني إكده؟ صوته كان واطي بس فيه فحيح أفعى مستعدة تلدغ. غزل ارتبكت: — بجول.. هخلص عدتي.. وأمشي من إهنه.. دياب نزل لمستواها، حط إيديه الاتنين على مسند الكرسي اللي هي قاعدة عليه، وحاصرها تماماً. عينيه كانت بتبص جوه عينيها مباشرة: — تمشي تروحي فين؟ لعمك رضوان اللي رماكي وانتي عيلة صغيرة جبال السرايا ومرضيش يصرف عليكي؟ ولا تروحي تشتغلي خدامة في بيوت البنادر؟ غزل دموعها لمعت في عينيها وردت بقهر: — أومال أعمل إيه؟ أجعد إهنه بصفتي إيه يا دياب؟ أنا كنت مرت أخوك.. ودلوك طليجته.. السرايا دي مبجتش مكاني.. والناس في البلد عتاكل وشي ووشك لو فضلت إهنه. دياب قرب وشه منها أكتر، لدرجة إنها حست بأنفاسه السخنة على وشها، وقال بكلمات طالعة من أعماق قلبه الملهوف: — الناس تجفل خشمها، والبلد كلياتها لو فتحت خشمها أحرجهالهم! إنتي مش طالعة من السرايا دي يا غزل.. مجعدك إهنه لحد ما تطلعي على الجبر.. السرايا دي بتاعتك، وإنتي ستها ومولاتها. — بصفتي إيييييه؟! صرخت غزل بدموع وتوهة، كأنها بتترجاه يديها إجابة تريح قلبها من الشكوك اللي دادة زينب زرعتها. دياب بص لشفايفها المرتجفة، ولعينيها الغرقانة في الدموع، مقدرش يمسك نفسه أكتر من كده. رفع إيده الخشنة وحطها على خدها بحنان، ومسح دمعة كانت هتنزل. — بصفتك تخصيني يا غزل.. تخصي دياب. الكلمة نزلت على غزل زي السحر. جسمها كله انتفض من لمسته ومن كلمته. تخصه؟ يعني دادة زينب كان كلامها صح؟ دياب بجد بيحبها؟ دياب كمل بصوت هامس ومبحوح من فرط المشاعر اللي كان كابتها سنين: — السنين اللي فاتت دي، أنا مكنتش بعيد.. كنت بشوفك كل يوم، كنت بتنفس هواكي من بعيد. غبائك وطفولتك خلوكي تشوفي فارس وتنسي دياب اللي كان بيحميكي. بس أنا سكتت عشان مجرحكيش. دلوك.. إنتي مبجتيش على ذمة حد.. إنتي حرة، وحريتك دي متسواش عندي حاجة غير إنك تفضلي جنجي. غزل كانت بتتنفس بسرعة، مش قادرة ترد، مش قادرة تستوعب كمية المشاعر والأمان اللي حاسة بيهم في اللحظة دي. لسه هتتكلم، الباب خبط بقوة وصوت دادة زينب كان بيزعق بره. دياب اتعدل بسرعة، ورجع خطوة لورا. — ادخل! زينب دخلت بتنهج، ووشها مخطوف: — دياب بيه.. الحج بسرعة! المصيبة جات لحد خشم الباب! دياب كشر: — في إيه يا دادة؟ مين اللي بره عيزعج إكده؟ — عمها.. رضوان.. رضوان جايب معاه رجالة من النجع، وواجفين على الباب بره، وعيقول إنه عرف إن غزل اتطلجت، وجاي ياخدها غصب عن عين أي حد عشان يزفها لراجل كبير في السن من معارفه وعدافعله مهر زين! غزل شهقت وحطت إيدها على بوقها برعب. جسمها كله بدأ يترعش. عمها رضوان ده راجل قاسي، مبيعرفش ربنا، وممكن يقتلها لو عارضته. دياب بص لغزل شاف الرعب في عينيها. الفك بتاعه اتصلب، وعروق رقبته برزت من الغضب. مد إيده مسك عصايته الأبنوس، ولبس عمته، وبصلها بنظرة كلها طمأنينة وتحدي في نفس الوقت: — متخافيش.. جولتلك اللي ملوش ضهر، دياب ضهره.. خليكي إهنه وماتطلعيش خطوة وحدة بره. خرج دياب من المندرة بخطوات سريعة، ووراه غزل اللي مقدرتش تقعد ومشت وراه من بعيد تستخبى ورا العمدان عشان تشوف إيه اللي هيحصل. وصل دياب لباب السرايا الخارجي. الغفرا كانوا ماسكين سلاحهم وواقفين قصاد رضوان والرجالة اللي معاه. رضوان كان لابس جلابية قديمة، وماسك عصاية، وبيزعق: — وسع ياد منك ليه! أنا جاي آخد بت أخوي! بت الغفير اللي رميتوها بعد ما شبعتوا منها.. أنا أولى بدمي ولحمي. دياب وقف على درجات السلم بتاعة السرايا، ورفع عصايته، صوته رن في المكان كله وخلى الكل يخرس: — صوتك ميعلاش في حرم السرايا يا رضوان! بدل ما أخرسلك لسانك ديه للأبد. رضوان بلع ريقه بخوف لما شاف دياب، بس حاول يستقوى بالرجالة اللي معاه: — دياب بيه! حقاني وإنت عارف الأصول! بت أخوي طليجة أخوك، وملهاش جعدة في سرايتكم بعد ما طلجها. أنا عمها وولي أمرها، وعريسها مستنيها.. هتدلى معايا دلوك. غزل كانت واقفة ورا الباب بتسمع وبتبكي رعب من فكرة إن عمها ياخدها وتتجوز راجل متعرفوش وتتباع زي الجارية. دياب نزل درجة من السلم، وضحك ضحكة باردة زلزلت قلب رضوان، وقال بصوت جهوري سمعه كل اللي واقفين: — ولي أمرها؟ بت أخوك إيه يا رضوان اللي جاي تاخدها؟ ومين جالك إن غزل طليجة أخوي وهتطلع بره السرايا؟ رضوان استغرب: — أومال إيه يا بيه؟ فارس بيه رمى عليها اليمين والبلد كلها خابرة! هتجعد بصفتها إيه؟ دياب رفع راسه بشموخ، وبصوت هز قلوب الكل، وأولهم قلب غزل اللي كان بيسمع من ورا الباب، أطلق الرصاصة الأخيرة: — غزل هتجعد بصفتها في حمايتي... وبصفتها مرتي المستقبلية وحرم دياب الهواري! كتب كتابي عليها بمجرد ما شهور عدتها تخلص... واللي هيفكر يجرب من حرم دياب الهواري، أو يجيب سيرتها على لسانه، هفضي سلاحي ديه في نفوخه قبل ما يرمش عينه! الصدمة نزلت على الكل زي صاعقة من السما. الغفرا بصوا لبعض بذهول، ورضوان فتح بوقه مش مصدق اللي بيسمعه. أما غزل ورا الباب... فقلبها توقف عن النبض للحظة، وحست إن الدنيا كلها بتلف بيها من قوة الكلمة... "حرم دياب الهواري"! لكن قبل ما أي حد ينطق بحرف، ظهر "فارس" من ورا رجالة رضوان، وهو بيسقف ببطء، وابتسامة شيطانية على وشه، وبيقول بصوت عالي: — يا حلاوة يا ولاد! العمدة الكبير بيلم فضلات أخوه الصغير! بس اللي متعرفوش يا دياب يا خوي... إن غزل... (وهنا يسكت فارس والابتسامة الماكرة على وشه...ووو ودي كانت نهايه اول حلقه من الروايه انا لها عاشق بقلم نور محمد لايك وكومنت ومتابعه لصفحه علشان انزل الحلقه الثانيه

مقالات ذات صلة

الوصيه الاخيره اماني السيد

حكايه عمر وملك الجزء الاخير للكاتبه سهر محمد

سلفتي حكايات نور محمد

في يوم الجنازه حكايات صافي

وقفت شابه عربيه مكبله الايدي

سر المفتاح الفضي محمد

اترك تعليقاً إلغاء الرد